У Столінскім райвыканкаме на гэтым тыдні адбыліся традыцыйныя ўжо сустрэчы кіраўніцтва регіёна са святарамі праваслаўнай, каталіцкай, пратэстанцкай канфесій.
Пытанні, што аднолькава хвалююць прадстаўнікоў усіх рэлігійных абшчын, абмяркоўвалі непасрэдна з удзелам старшыні райвыканкама Рыгора Пратасавіцкага, а таксама яго намеснікаў і кіраўнікоў арганізацый.
Пра аказанне паслуг неабароненым катэгорыям грамадзян, пажылым, інвалідам усіх узростаў гаварыла дырэктар тэрытарыяльнага цэнтра сацыяльнага абслугоўвання насельніцтва Людміла Мароз. На дзяржаўным узроўні замацаваны пэўныя льготы для названых катэгорый, ствараюцца ўмовы безбар’ернага асяроддзя, ёсць паслугі сацыяльных работнікаў і шмат іншага. Аднак часам усё ж не хапае інфармаванасці па тым ці іншым пытанні. Гэта пацвярджаюць звароты людзей падчас асабістага прыёму грамадзян, прамых тэлефонных ліній.
Абяркоўвалі і пытанні духоўнага, патрыятычнага выхавання падлеткаў, бо гэтай тэме трэба надаваць асаблівую ўвагу.
Асобна спыніліся на тэме аздараўлення школьнікаў. На жаль, у шэрагу населеных пунктаў, большасць з якіх знаходзіцца ў зоне Альшан і Вялікага Малешава, стала складана сабраць групу школьнікаў, каб адправіць у санаторый. І галоўная прычына – нежаданне бацькоў. Чым яны матывуюць свой адказ, лагічнага тлумачэння няма. Хіба здароўе не галоўнае багацце? Тым больш, што аздараўленне цалкам за кошт дзяржаўных сродкаў. А гэта прыкладна 900 рублёў на адно дзіця. Значыць, дарослыя свядома пазбаўляюць сваіх чадаў скарыстацца такой ільготай?
Не абышлі ўвагай і пандэмію каранавіруснай інфекцыі. Адназначна, што ў барацьбе з гэтым захворваннем атрымаць перамогу можна толькі пры калектыўным імунітэце. Дасягаецца ён простым спосабам – вакцынацыяй. Хвілінная працэдура можа стаць сапраўдным выратавальнікам людзей. Вось толькі не ўсе жыхары раёна спяшаюцца выканаць настойлівыя парады медыкаў па вакцынацыі.
Як адзначыў галоўны ўрач Столінскай ЦРБ Віктар Майсюк, прааналізаваўшы, з якіх населеных пунктаў на цяперашні час найбольш хворых, можна адназначна сказаць, што там найменшая колькасць вакцынаваных. Гэта, напрыклад, Плотніца і Рухча. Інфармацыі для насельніцтва шмат, але чамусьці мы падвяргаем сумненню довады медыцынскіх работнікаў, а верым нічым не пацверджаным меркаванням нейкіх, так званых, дамарослых экспертаў. Кожны павінен займацца сваёй справай! Нельга распаўсюджваць сярод іншых думкі на ўзроўні, што дзесьці-хтосьці-калісьці сказаў… Тыя, каму давялося правесці на бальнічных ложках з-за кавіду не адзін дзясятак дзён, пасля выздараўлення задаюць адно пытанне – калі можна вакцынавацца?
Начальнік РАНС Аляксандр Мінчык нагадаў святарам пра неабходнасць захавання правілаў пажарнай бяспекі пры правядзенні службаў. Тым больш, што хутка вялікія рэлігійныя святы, на службу будзе збірацца шмат людзей.
На сустрэчах у райвыканкаме гаварылі таксама і пра ўзаемадзеянне органаў улады з рэлігійнымі арганізацыямі. Размова была і пра маючы адбыцца рэферэндум. Усім нам трэба адказна паставіцца да гэтай падзеі і прыняць актыўны ўдзел. Мець актыўную жыццёвую пазіцыю.
З боку святароў прагучалі і хвалюючыя іх пытанні. Сярод якіх – усталяванне прыпынку для школьнікаў у зручным і бяспечным месцы, вываз смецця, работа стацыянарных тэлефонаў, рамонт дарогі, спілаванне дрэў і іншыя.
Старшыня райвыканкама Рыгор Пратасавіцкі ў першую чаргу выказаў словы падзякі ўсім удзельнікам сустрэчы за тое, што адгукаюцца на запрашэнні аб сустрэчы, што не застаюцца ў баку ад самых розных падзей і мерапрыемстваў. І пажадаў, канешне, каб было больш спраў, што аб’ядноўваюць людзей у іх лепшых імкненнях.
Алена КЛІМУШКА
Фота
аўтара
