У наяўнасці – тры вакцыны

На 13 красавіка вакцынацыяй ад CОVID-19 ахоплена 26,2 працэнта жыхароў нашага раёна пры сярэднеабласным паказчыку 23,4 працэнта.
Як паведаміў галоўны санітарны ўрач раёна Антон Маджара, вакцыны на Століншчыне дастаткова. У наяўнасці «Спутник» і «Вера цэл» (абодва кампаненты), а таксама аднакампанентная вакцына «Спутник лайт», якой плануецца рабіць прышчэпкі моладзі – студэнтам, прызыўнікам.
За мінулы тыдзень супрацоўнікі раённага цэнтра гігіены і эпідэміялогіі правялі маніторынг 58 аб’ектаў нагляду. У 26-і выяўлены парушэнні, звязаныя з прафілактыкай каранавіруснай інфекцыі.
Кіраўнікам прадпрыемстваў і арганізацый раёна рэкамендавана пасіліць захады па барацьбе з вірусам. У прыватнасці, да ўжо знаёмых мер прафілактыкі дадаць дэзінфекцыю мабільных і стацыянарных тэлефонаў супрацоўнікаў.
І галоўнае: РЦГЭ прапануе абмежаваць правядзенне масавых мерапрыемстваў – спартыўных, культурных, забаўляльных.
Лілія ГУШЧА