У гэтым годзе Троіцкія гулянні ўпершыню ладзіліся ў вёсцы Талмачава.
Прыехаўшы, адразу заўважыла, што тут вельмі чакалі гэтага свята. Да магазіна, дзе была зроблена сцэна, ішлі сем’і з дзецьмі, жыхары старэйшага ўзросту, моладзь. Пакуль наладжвалася апаратура, людзі віншавалі адзін аднаго і няспешна гутарылі.
Канцэртная праграма, якая была падрыхтавана аўтаклубам аддзела культуры, пачалася са святочнага траецкага шэсця. Тэатралізаваная частка закончылася карагодам.
Потым жанчыны ў народным адзенні частавалі ўсіх прысутных яечняй і караваем і раздавалі галінкі бярозы – сімвалы Тройцы. Песні, якія выконвалі артысты, з задавальненнем падпявалі жыхары вёскі, а некаторыя нават пусціліся ў танцы. Нумары падрыхтавалі народны клуб аматараў песні “Ярок”, народны творчы клуб «Альтанка», калектыў Рамельскага цэнтра культуры і вольнага часу, Давыд-Гарадоцкага і Вялікамалешаўскага дамоў культуры. Удзельнікі ўзорнага ансамбля фальклорнага танца “Ніва” выступілі з народнымі танцамі. Свае выставы прадэманстравалі Кароціцкі і Вялікамалешаўскі дамы культуры, а таксама Альгомельскі і Луткаўскі сельскія клубы.
Для жыхароў вёскі і гасцей былі арганізаваны гандлёвыя кропкі, дзе можна было набыць поп-корн, марожанае, напоі, паветраныя шары, цацкі і сувеніры.
Гутарыўшы з жыхарамі, было прыемна чуць словы падзякі. Людзі сапраўды адпачывалі душой і целам. На свята прыйшла маладая сям’я Уладзіміра і Надзеі Вячоркаў з дочкамі-двайнятамі Софіяй і Палінай.
– Дзякуй за цудоўны настрой, – сказалі яны. – Добра, што прыехалі да нас, бо не так часта ладзяцца ў нас такія святы. А тут і адпачылі, і з аднавяскоўцамі пабачыліся, і атрымалі асалоду ад канцэрта.
Далучыліся да слоў карэнныя жыхары Фёдар і Кацярына Крук, якія былі са сваімі ўнукамі Дзмітрыем і Марыяй.
– Артысты – малайцы, песні краналі душу, – падзялілася сваімі ўражаннямі Кацярына Фёдараўна. – Мы, талмачаўцы, вельмі любім спяваць. Доўгі час з мужам былі ў фальклорным калектыве “Каліна”. Таму для нас песня, як лекі. Ды і нашым унукам было цікава. На адным дыханні прайшло выступленне, нават разыходзіцца не хацелі.
Ды і самі артысты засталіся задаволеныя, паколькі адчувалі сувязь з гледачамі. Некалькі тыдняў таму сюды прыязджаў аўтаклуб з забаўляльнай праграмай, і дзеці настолькі былі рады, што падыходзілі і абдымалі артыстаў.
Многія выказалі прапановы ў наступны раз праводзіць мерапрыемствы ў дубовым гаі, які з’яўляецца любімым месцам адпачынку. Прадстаўнікі моладзі агучылі жаданне аб правядзенні дыскатэкі.
У час правядзення свята ад раённай газеты “Навіны Палесся” Пісьмы падзякі былі ўручаны калектыву аддзялення сувязі аграгарадка Кароцічы: начальніку Алене Гананайка і паштальёнам Наталлі Кудласевіч, Наталлі Леська і Марыі Паграноўскай, якая з-за хваробы, на жаль, не змагла прыйсці на святкаванне. Але яе добра ведаюць мясцовыя жыхары, паколькі менавіта яна дастаўляе газеты ў Талмачава. Дарэчы, усе, з кім гутарыла, з’яўляюцца падпісчыкамі “Навін Палесся”. А значыць, ім будзе цікава прачытаць матэрыял пра святкаванне Тройцы ў іх роднай вёсцы. І да наступных сустрэч!
Ганна МЕЛЬНІК
Фота аўтара
