Халодным лістападаўскім вечарам была цёплая і радасная нагода сабрацца ў сярэдняй школе
№ 1 г. Давыд-Гарадка – 90-гадовы юбілей.
Урачыстае святкаванне наведалі многія паважаныя госці, сярод якіх кіраўніцтва раёна, устаноў і прадпрыемстваў горада, былыя вучні і настаўнікі школы. На ўваходзе сустракаў карабель з пунсовымі ветразямі, а ў самой школе дапаўнялі святочную абстаноўку дзве фотазоны, фонам
адной з якіх сталі фотаздымкі выпускаў школы.
Як тэатр пачынаецца з вешалкі, так кожны юбілей пачынаецца з гісторыі, а яна багатая, бо адукацыя заўсёды мела для жыхароў горада вялікае значэнне. У гістарычнай літаратуры ёсць звесткі, што яшчэ ў далёкім 1663 годзе ў Давыд-Гарадку быў адкрыты філіял Пінскай школы для 3-5 класаў. У 1863 годзе было створана народнае вучылішча на 107 чалавек, а праз тры гады – царкоўна-прыходская жаночая школа. У 1908 годзе працавала вучылішча з шасцігадовым тэрмінам навучання. З 1917 па 1939 гады з невялікімі перапынкамі існавала яўрэйская школа, што недзіўна – да пачатку Вялікай Айчыннай вайны яўрэі складалі трэцюю частку насельніцтва.
Пасля падпісання Рыжскага мірнага дагавору ў 1921 годзе Заходняя Беларусь, у тым ліку і Давыд-Гарадок, адышлі да Польшчы. І літаральна ў наступным годзе была адкрыта польская школа, у якой навучанне праходзіла выключна на чужой мове. І толькі ў 1930 годзе пачала дзейнічаць беларуская сямігадовая школа. У 1933-1934 годах пабудаваны трохпавярховы будынак школы, які быў самым большым сярод устаноў адукацыі ва ўсёй тады яшчэ Пінскай вобласці. Дарэчы, частка таго памяшкання і дагэтуль служыць ужо ў сучаснай школе.
У ваенныя гады школа была шпіталем, і ёсць дакладныя звесткі, што яна была пашко-джана снарадам.
Узнавілася навучанне толькі пасля вызвалення нашай краіны, і ў 1949 годзе адбыўся першы пасляваенны выпуск. Новыя вучні прыходзілі ў класы, адрамантаваныя руплівымі рукамі настаўнікаў і жыхароў горада. Яшчэ быў дэфіцыт кніг, ды і ўсяго школьнага інвентару, але вочы дзяцей блішчалі ад радасці, бо яны будуць набываць веды, а не хавацца ад ворага.
Школа да 1960-ых гадоў была беларускамоўнай, таму і зараз старажылы яе называюць беларускай. Яна стала роднай больш чым для 4000 выпускнікоў, сярод якіх урачы, інжынеры, дзеячы культуры і прадстаўнікі іншых прафесій.
Кіравалі школай восем дырэктароў, а зараз гэтую ганаровую, але разам з тым такую адказную пасаду займае Валянціна Рыгораўна Хілінская. Менавіта ёй перадаў Ганаровую грамату Столінскага райвыканкама намеснік аддзела ідэалагічнай работы і па справах моладзі Вадзім Заруба. Ён адзначыў вялікі ўзровень падрыхтоўкі вучняў гэтай школы, паколькі яны дастойна прадстаўляюць горад і раён у цэлым на шматлікіх мерапрыемствах і форумах. Шчыра парадаваўся таму, што 90-гадовы юбілей школа сустракае ў сваіх родных сценах, і таму, што няма дэфіцыту педагагічных кадраў. Значыць, будучыня ў надзейных руках.
З прывітальным словам выступіла намеснік начальніка аддзела па адукацыі Алена Васькавец і ўручыла Ганаровыя граматы за прафесійнае майстэрства, адданасць сваёй справе, добрасумленную працу, поспехі ў навучанні і выхаванні падрастаючага пакалення і ў сувязі з 90-гадовым юбілеем настаўніку англійскай мовы Алене Вабішчэвіч, педагогу сацыяльнаму Ірыне Асіпенка, настаўніку інфарматыкі Наталіі Свірыдчук, настаўніку фізікі Наталлі Сеген, настаўнікам пачатковых класаў Таццяне Гайкевіч, Лідзіі Пашкевіч і Алене Палукошка.
Ад Столінскай раённай прафсаюзнай арганізацыі беларускага саюза работнікаў адукацыі і навукі трымала слова старшыня Людміла Цупа. Яна павіншавала калектыў і дадала, што ўсё толькі пачынаецца і наперадзе новыя юбілей, прыемныя падзеі і дасягненні. Таксама ўручыла Ганаровыя граматы за актыўную работу, высокія прафесійныя заслугі і ў сувязі з юбілеем настаўніку матэматыкі і інфарматыкі Аляксандру Калько, настаўніку фізічнай культуры і здароўя Аляксандру Кіпко-Кулага, настаўніку працоўнага навучання Івану Харашуну, інспектару па кадрам Наталіі Ядлоўскай, сакратару школы Галіне Сцецкай, бібліятэкару і намесніку старшыні прафкама Таццяне Місюра, рабочаму па комплекснаму абслугоўванню Валерыю Ляшкевічу.
Ад Столінскага раённага Савета дэпутатаў узнагароджана настаўнік біялогіі Ніна Кудласевіч за шматгадовую добрасумленную працу, значны асабісты ўклад і дасягнутыя вынікі ў экалагічнай адукацыі навучэнцаў, і ў сувязі з 90-гадовым юбілеем школы.
Звярнуўся да сваіх землякоў старшыня Давыд-Гарадоцкага выканаўчага камітэта Вячаслаў Стаднік, які падзякаваў калектыў за адданасць сваёй прафесіі. За развіццё адукацыйнага працэсу, актыўную жыццёвую пазіцыю, уклад у гісторыка-культурную спадчыну горада і ў сувязі з юбілеем Ганаровымі граматамі адзначаны дырэктар школы Валянціна Хілінская, намеснік дырэктара па выхаваўчай рабоце Ганна Пашкевіч, настаўнік беларускай мовы і літаратуры Ірына Гулакова, выхавальнік групы падоўжанага дня Таццяна Петравец, настаўнік пачатковых класаў Ала Шышко.
Часткай святочнай праграмы было сімвалічнае запальванне свечак, і адну з іх – свечку Мудрасці – запаліў былы дырэктар школы Канстанцін Сцяпура. Ён прыняў эстафету ў 1999 годзе ад Анатоля Жаўнерчука і праз 15 гадоў перадаў яе цяперашнему кіраўніку Валянціне Рыгораўне. Віншавалі школу ветэраны педагагічнай працы, ад імя якіх слова ўзялі настаўнік пачатковых класаў Ларыса Мігалевіч і настаўнік рускай мовы і літаратуры Ніна Марчук. Тых настаўнікаў, каго няма на гэтым свеце, прысутныя ўзгадалі і ўшанавалі хвілінай маўчання.
Не абмінулі ўвагай такую важную падзею, як юбілей роднай школы, яе былыя выпускнікі, а цяпер паспяховыя і таленавітыя кіраўнікі. Душэўна павіншавала Анжэла Тукіна – урач-гінеколаг, загадчык філіяла УЗ «Столінская ЦРБ «Давыд-Гарадоцкая бальніца», якая быццам перанеслася ў мінулае, калі на чале з класным кіраўніком Канстанцінам Іванавічам ладзілі школьныя вечары. Адзначыла якасць ведаў, атрыманых у роднай школе, таму пры паступленні была на адной прыступцы з вучнямі гімназій і спецыялізаваных навучальных устаноў.
Адказвалі на сімвалічныя білеты, падрыхтаваныя вядучымі, начальнік пажарнай аварыйна-выратавальнай часці № 2 Валерый Свірыдчук і дырэктар Палескага лясгаса Фёдар Сыса.
З падарункамі прыйшлі і прадпрымальнікі горада, адзін з якіх – заснавальнік прыватнага транспартнага ўнітарнага прадпрыемства «Аласта Транс» Юлія Дранец, якая ў мінулым годзе стала пераможцай Нацыянальнага конкурсу «Прадпрымальнік года». Падзякавала настаўнікам, пажадала поспехаў, а таксама разам з сынам Аляксандрам запаліла свечку «Дзяцінства».
Дырэктар Дома культуры Марына Кравец – таксама выпускніца гэтай школы – падрыхтавала танцавальныя нумары. Прыгожым дапаўненнем стала выступленне вучняў школы Ніколь Ляшкевіч ра-зам з маці Марыяй і Анастасіі Лагодзіч. Некалькі песен падарыла Ніна Комік, пажадаўшы міру і дабра гасцям юбілея.
Мы таксама жадаем школе яшчэ большага росквіту, каб наступны юбілей сустрэць яшчэ больш памаладзеўшай.
Ганна МЕЛЬНІК
Фота аўтара
