Урачыстае мерапрыемства з нагоды ўшанавання галоўных сімвалаў Беларусі прайшло ў нядзелю ў райцэнтры на плошчы Леніна.
Па традыцыі ў святкаванні прымае ўдзел шмат моладзі – навучэнцы школ, каледжаў. Таму што менавіта сёння будучым грамадзянам Беларусі трэба прывіваць павагу і пашану да сваёй Радзімы. Канешне ж, у першую чаргу гаворка ідзе пра яе сімвалы – Сцяг, Герб і Гімн.
Зацверджаныя на рэферэндумах у 1995 і 2022 гадах, яны сталі атаясамленнем свабоды і незалежнасці краіны.
З вітальным словам да ўдзельнікаў урачыстасці звярнуўся дэпутат Палаты прадстаўнікоў Нацыянальнага сходу Рэспублікі Беларусь Аляксандр Вячорка.
– Дзяржаўныя сімвалы – гэта наша гістарычная памяць, што звязвае ў адно гераічнае мінулае, сённяшняе і будучыню беларускай дзяржавы, – адзначыў Аляксандр Мікалаевіч. – Нядаўна мы адзначылі 80-годдзе Вялікай Перамогі. Мы памятаем і ўшаноўваем герояў, якія загінулі на палях бітваў, падарылі нам шанец жыць на жыватворнай беларускай зямлі. Наш абавязак берагчы праўду пра вайну, а уважлівае стаўленне да дзяржаўных сімвалаў – гэта адзін са спосабаў праяўлення патрыятызму, гонару за краіну, гатоўнасць яе абараняць. Мы славім нашы нацыяльныя каштоўнасці – імкненне да міру, адзінства, свабоду, сяброўства, гонар і працавітасць, мужнасць.
У 2021 годзе ў Мінску на плошчы Дзяржаўнага сцяга быў усталяваны рытуал прынясення клятвы вернасці Дзяржаўнаму сцягу Рэспублікі Беларусь. Так і на сённяшняй урачыстасці моладзь Століншчыны ад імя ўсіх сваіх аднагодкаў сказалі словы Клятвы. «Мы – прадстаўнікі маладога пакалення, якое выхавана ў традыцыях павагі да гераічнага мінулага і подзвігу продкаў; якое думкамі, пачуццямі і справамі даказвае вернасць Бацькаўшчыне; якое з гонарам бярэ на сябе адказнасць за будучыню Беларусі. Клянёмся быць годнымі грамадзянамі Рэспублікі Беларусь, захоўваць мір і спакой на беларускай зямлі, і калі спатрэбіцца, абараняць яе гэтак жа годна і самааддана, як нашы прадзеды ў гады Вялікай Айчыннай вайны».
Яшчэ адной неад’емнай часткай святкавання Дня галоўных сімвалаў краіны стала ўручэнне пашпартоў юным жыхарам раёна. З атрыманнем першага дакумента, які сімвалізуе ўступленне ў дарослае жыццё, падлеткаў павіншаваў старшыня Столінскага райвыканкама Аляксандр Пачко.
Ад імя моладзі раёна навучэнка гімназіі Ганна Бруцкая запэўніла ў тым, што яны будуць годнымі пераемнікамі традыцый. Будуць з гонарам несці званне – грамадзянін Беларусі.
Па завяршэнні канцэртнага пралогу да брацкай магілы загінуўшых савецкіх воінаў і партызан былі ўскладзены кветкі. Хвіліна маўчання…
Алена КЛІМУШКА
Фота Аляксандра НІКІФАРЭНКІ
