У паэтэсы Рымы Казаковай ёсць верш, які пачынаецца менавіта з гэтых слоў. Твор прыйшоўся даспадобы многім чытачам. Асабліва часта яго любяць дэкламаваць у гонар прыгожай паловы чалавецтва на яскравае свята –Дзень жанчын.
Нягледзячы на дасягненні сучаснага свету, па-ранейшаму адной з самых галоўных місій жанчыны з’яўляецца мацярынства. І гэта таксама праца, праца быць маці. А калі ў сям’і не адно і не два, а пяць дзетак? Як спраўляецца матуля? Як паспявае ўсё зрабіць? Наколькі важна на-дзейнае мужчынскае плячо? Пра гэта і многае іншае гутарылі напярэдадні свята 8 Сакавіка з матулямі, якія папоўнілі рады тых жанчын, хто мае высокую ўзнагароду – ордэн Маці.
Для дзесяці жыхарак аграгарадка Альшаны свята пачалося з візіту ў музей Маці і сям’і ў Століне.
Жанчыны засталіся пад вялікім уражаннем ад экскурсіі, якую, дарэчы, па традыцыі праводзяць вучні школ райцэнтра.
Далей адбылася сустрэча з кіраўніцтвам раёна на чале са старшынёю райвыканкама Рыгорам Пратасавіцкім. Гісторыі знаёмства, стварэння сям’і, жыццёвы ўклад – пра гэта было вельмі цікава слухаць ад гераінь дня – маці, якія нарадзілі і выхавалі пяцёра дзетак.
Хвалюючы момант – уручэнне ордэна Маці – прайшоў у Столінскім раённым цэнтры культуры пры поўнай глядзельнай зале. Гучныя апладысменты суправаджалі ўсіх узнагароджаных. На сцэне – сапраўдныя гераіні дня – прыгожыя, абаяльныя, мілыя матулечкі! Гэта Аліна Бабко, Ганна Грыб, Аксана Гром, Марыя Лемяза, Наталля Мазоль, Ліана Быба, Вольга Грыб, Наталля Грыб, Ганна Мамайка і Марына Сыса.
Яскравым падарункам для ўсіх была канцэртная праграма ад прадстаўнікоў сферы культуры раёна.
Алена КЛІМУШКА
Фота аўтара
і Уладзіміра ДАМАШЧУКА
